परीक्षा नाही, मुलाखत नाही! दहावीच्या गुणांवर पोस्ट ऑफिसमध्ये 23,757 जागांची महाभरती (2026)

अमरावतीसह महाराष्ट्रातील दहावी पास उमेदवारांसाठी मोठी संधी; 21 सप्टेंबरपर्यंत करता येणार ऑनलाईन अर्ज

अमरावती : सरकारी नोकरीच्या शोधात असलेल्या दहावी उत्तीर्ण तरुणांसाठी मोठी संधी उपलब्ध झाली आहे. भारतीय टपाल विभागाने ग्रामीण डाक सेवक अर्थात GDS पदांच्या तब्बल 23,757 जागांसाठी भरती प्रक्रिया जाहीर केली आहे. या भरतीचे सर्वात मोठे वैशिष्ट्य म्हणजे उमेदवारांना कोणतीही लेखी परीक्षा किंवा मुलाखत द्यावी लागणार नाही. निवड थेट दहावीच्या गुणांच्या आधारे तयार होणाऱ्या गुणवत्ता यादीतून केली जाणार आहे. या भरतीअंतर्गत शाखा पोस्टमास्टर अर्थात BPM, सहायक शाखा पोस्टमास्टर ABPM आणि डाक सेवक या पदांसाठी उमेदवारांची निवड करण्यात येणार आहे. देशभरातील विविध पोस्टल सर्कलमध्ये ही भरती होणार असून महाराष्ट्रातील उमेदवारांनाही मोठी संधी उपलब्ध आहे. अमरावती, अकोला, यवतमाळ, बुलढाणा, वर्धा, नागपूर आणि चंद्रपूरसह महाराष्ट्रातील विविध टपाल विभागांचा महाराष्ट्र सर्कलमध्ये समावेश आहे. त्यामुळे अमरावती आणि विदर्भातील दहावी उत्तीर्ण तरुणांनी या भरतीकडे विशेष लक्ष देण्याची गरज आहे.

अर्जासाठी अजूनही संधी

या भरतीसाठी One Time Registration म्हणजेच OTR प्रक्रिया 31 ऑगस्टपासून सुरू झाली आहे. ऑनलाईन अर्ज प्रक्रिया 2 सप्टेंबरपासून सुरू झाली असून इच्छुक उमेदवारांना 21 सप्टेंबर 2026 रोजी सायंकाळी 5 वाजेपर्यंत अर्ज करता येणार आहे . OTR करण्याची अंतिम मुदत 19 सप्टेंबरपर्यंत आहे. त्यामुळे अर्ज करायचा विचार असेल तर शेवटच्या दिवसाची वाट न पाहता आधी रजिस्ट्रेशन पूर्ण करणे महत्त्वाचे ठरणार आहे. अर्ज भरताना काही चूक झाल्यास 23 आणि 24 सप्टेंबर रोजी अर्जात दुरुस्ती करण्याची संधी दिली जाणार आहे.
या भरतीसाठी One Time Registration म्हणजेच OTR प्रक्रिया 31 ऑगस्टपासून सुरू झाली आहे. ऑनलाईन अर्ज प्रक्रिया 2 सप्टेंबरपासून सुरू झाली असून इच्छुक उमेदवारांना 21 सप्टेंबर 2026 रोजी सायंकाळी 5 वाजेपर्यंत अर्ज करता येणार आहे.

महत्त्वाच्या तारखा

कोण अर्ज करू शकतो?

या भरतीसाठी उमेदवार किमान दहावी उत्तीर्ण असणे आवश्यक आहे. दहावीमध्ये गणित आणि इंग्रजी विषय उत्तीर्ण असणे गरजेचे आहे. महाराष्ट्रासाठी अर्ज करणाऱ्या उमेदवाराने दहावीपर्यंत मराठी भाषेचा अभ्यास केलेला असावा. याशिवाय, उमेदवाराला मूलभूत संगणकाचे ज्ञान असणे आवश्यक आहे. ग्रामीण भागात टपाल वाटपाशी संबंधित काम असल्याने काही पदांसाठी सायकल चालवता येणेही आवश्यक आहे. अर्जदाराचे वय किमान 18 आणि कमाल 40 वर्षे असावे. मात्र, SC, ST, OBC आणि दिव्यांग उमेदवारांना शासनाच्या नियमानुसार वयोमर्यादेत सूट मिळणार आहे.

निवड कशी होणार?

या भरतीत कोणतीही स्पर्धा परीक्षा नाही. उमेदवारांच्या दहावीच्या गुणांच्या आधारे गुणवत्ता यादी तयार केली जाणार आहे. त्यामुळे चांगले गुण मिळवलेल्या उमेदवारांसाठी निवडीची संधी अधिक असू शकते. गुणवत्ता यादीत नाव आल्यानंतर उमेदवारांना कागदपत्र पडताळणीसाठी बोलावण्यात येईल. अंतिम निवड संबंधित नियम आणि कागदपत्रांच्या पडताळणीनंतर होईल.

अर्ज शुल्क किती?

सर्वसाधारण, OBC आणि EWS प्रवर्गातील पुरुष उमेदवारांसाठी अर्ज शुल्क 100 रुपये आहे. महिला, SC, ST, दिव्यांग आणि ट्रान्सवुमन उमेदवारांना अर्ज शुल्कातून सूट देण्यात आली आहे. अर्ज करण्यापूर्वी दहावीचे गुणपत्रक, जन्मतारखेचा पुरावा, जात प्रमाणपत्र लागू असल्यास त्याची प्रत, फोटो, स्वाक्षरी, वैध मोबाईल क्रमांक आणि ई-मेल आयडी तयार ठेवावा.

अमरावतीच्या उमेदवारांसाठी विशेष लक्ष

अमरावती पोस्टल डिव्हिजन हा महाराष्ट्र सर्कलचा भाग आहे. अर्ज भरताना उमेदवारांना Maharashtra Circle निवडून उपलब्ध पर्यायांमधून संबंधित डिव्हिजन निवडता येईल. मात्र, अमरावती विभागात नेमक्या किती जागा आहेत आणि कोणत्या पदांसाठी रिक्त जागा उपलब्ध आहेत, याची माहिती अधिकृत अधिसूचनेत तपासणे आवश्यक आहे. सरकारी क्षेत्रात काम करण्याची इच्छा असलेल्या आणि दहावी उत्तीर्ण उमेदवारांसाठी ही संधी महत्त्वाची ठरू शकते. परीक्षा नाही, मुलाखत नाही आणि निवड थेट दहावीच्या गुणांच्या आधारे होणार असल्याने इच्छुक उमेदवारांनी ही संधी गमावू नये.

अधिकृत अर्जासाठी: India Post GDS Online Portal

टीप : अर्ज करण्यापूर्वी अधिकृत अधिसूचना काळजीपूर्वक वाचावी. रिक्त जागा, पात्रता, निवड प्रक्रिया आणि इतर अटींबाबत अंतिम निर्णय भारतीय टपाल विभागाच्या अधिकृत अधिसूचनेनुसार लागू राहील.