दापोरीच्या बंद आरओ प्लांटवर ‘वंचित’चा दबाव; BDO थेट गावात, ८ दिवसांत कारवाईचे आश्वासन!

निवेदनानंतर प्रशासनाची ऑन-ग्राउंड पाहणी; ‘फक्त आश्वासन नको, प्रत्यक्ष प्लांट सुरू करा’ असा वंचितचा इशारा

तिवसा : दापोरी गावातील गेल्या अनेक दिवसांपासून बंद असलेल्या आर.ओ. (RO) वॉटर प्लांटचा प्रश्न आता चांगलाच चर्चेत आला आहे. काही दिवसांपूर्वी वंचित बहुजन आघाडीने तिवसा पंचायत समितीवर धडक देत बंद ( संबंधित बातमीची लिंक ) आरओ प्लांटसह ग्रामीण भागातील विविध नागरी आणि आरोग्यविषयक प्रश्न प्रशासनासमोर मांडले होते. यावेळी मागण्यांवर आठ दिवसांत ठोस कार्यवाही झाली नाही, तर गावकऱ्यांना सोबत घेऊन पंचायत समितीसमोर ठिय्या आंदोलन करण्याचा इशारा देण्यात आला होता. या इशाऱ्यानंतर प्रशासनाने दापोरीच्या प्रश्नाची दखल घेतली असून तिवसा पंचायत समितीचे गटविकास अधिकारी (BDO) यांनी प्रत्यक्ष दापोरी गावात जाऊन बंद आरओ प्लांटची पाहणी केली. यावेळी वंचित बहुजन आघाडीचे पदाधिकारी, कार्यकर्ते आणि स्थानिक ग्रामस्थही उपस्थित होते.

निवेदनानंतर प्रशासन थेट गावात

ग्रामीण भागातील नागरिकांना शुद्ध पिण्याचे पाणी उपलब्ध व्हावे, या उद्देशाने उभारण्यात आलेला आरओ प्लांट बंद असल्याने गावकऱ्यांना पाण्यासाठी अडचणींचा सामना करावा लागत असल्याचा मुद्दा वंचित बहुजन आघाडीने उपस्थित केला होता. विशेषतः पावसाळ्यात पाण्याच्या गुणवत्तेचा प्रश्न अधिक गंभीर होऊ शकतो. अशा परिस्थितीत गावात उपलब्ध असलेली पाणी शुद्धीकरणाची सुविधा बंद राहणे योग्य नाही, अशी भूमिका कार्यकर्त्यांनी मांडली. याच पार्श्वभूमीवर BDO अधिकाऱ्यांनी प्लांटची प्रत्यक्ष पाहणी केली. प्लांटची सद्यस्थिती, बंद पडण्यामागील कारणे आणि तो पुन्हा सुरू करण्यासाठी आवश्यक असलेल्या उपाययोजनांची माहिती घेण्यात आली.

‘प्लांट तात्काळ सुरू करा’, वंचितची मागणी

पाहणीदरम्यान वंचित बहुजन आघाडीच्या पदाधिकाऱ्यांनी आरओ प्लांटची आवश्यक दुरुस्ती करून तो शक्य तितक्या लवकर सुरू करण्याची मागणी केली. तसेच प्लांट इतके दिवस बंद का आहे, याचीही चौकशी करण्यात यावी, अशी मागणी करण्यात आली. सरकारी निधीतून उभारलेली सुविधा वापरात नसल्यास त्याचा थेट फटका गावकऱ्यांना बसतो. त्यामुळे केवळ कागदोपत्री प्रक्रिया न करता प्रत्यक्ष काम सुरू करून नागरिकांना शुद्ध पाणी उपलब्ध करून द्यावे, अशी भूमिका यावेळी मांडण्यात आली. प्रशासनाकडूनही याबाबत तातडीने आवश्यक कार्यवाही करून आरओ प्लांट लवकरात लवकर सुरू करण्याचे आश्वासन देण्यात आल्याची माहिती आहे.

‘फक्त निवेदन देऊन थांबणार नाही’

वंचित बहुजन युवा आघाडीचे जिल्हा महासचिव सागर भवते यांनी प्रशासनाच्या प्रत्यक्ष पाहणीचे स्वागत केले. मात्र, प्रश्न केवळ पाहणी आणि आश्वासनावर थांबणार नसल्याचे त्यांनी स्पष्ट केले. “फक्त निवेदने देऊन थांबणे हा आमचा उद्देश नाही. प्रशासनाला सोबत घेऊन प्रत्यक्ष जागेवर जाऊन जनतेचे प्रश्न मार्गी लावणे, हीच आमची कार्यपद्धती आहे,” अशी भूमिका त्यांनी व्यक्त केली. तसेच आठ दिवसांच्या कालावधीत आरओ प्लांट सुरू करण्यासह इतर मागण्यांवर ठोस कार्यवाही झाली नाही, तर तीव्र जनआंदोलन छेडण्यात येईल, असा इशाराही त्यांनी दिला.

इतर प्रश्नांवरही प्रशासनाची परीक्षा

दापोरीच्या आरओ प्लांटबरोबरच वंचित बहुजन आघाडीने तिवसा तालुक्यातील अनुसूचित जाती वस्त्यांमधील नागरी समस्या, पावसाळ्यातील स्वच्छता, चिखल व अस्वच्छता, नियमित धूर फवारणी आणि वरूडा येथील पुलाच्या निकृष्ट कामाची चौकशी यांसारखे प्रश्नही प्रशासनासमोर मांडले आहेत. त्यामुळे आता प्रशासनाने दिलेल्या आश्वासनांची प्रत्यक्ष अंमलबजावणी होते का, याकडे ग्रामस्थांचे लक्ष लागले आहे. विशेषतः दापोरीचा बंद आरओ प्लांट आठ दिवसांत प्रत्यक्ष सुरू होतो का, हा या संपूर्ण प्रकरणातील महत्त्वाचा मुद्दा ठरणार आहे.

दरम्यान, पाहणीवेळी वंचित बहुजन आघाडीचे दापोरी येथील पदाधिकारी, कार्यकर्ते आणि स्थानिक ग्रामस्थ मोठ्या संख्येने उपस्थित होते. प्रशासनाच्या पुढील कारवाईवरच आता वंचितची पुढील भूमिका ठरणार असल्याचे चित्र आहे.