नशामुक्त अमरावतीचा संदेश घेऊन विद्यार्थ्यांची रॅली; ८०० विद्यार्थी आणि २०० पोलिसांचा उत्स्फूर्त सहभाग

अमरावती, दि. 29 : राष्ट्रीय क्रीडा दिनानिमित्त अमरावती शहरात आज एक वेगळाच उत्साह पाहायला मिळाला. हातात जनजागृतीचे संदेश, व्यसनमुक्तीच्या घोषणा आणि निरोगी आयुष्याचा संकल्प घेऊन शेकडो विद्यार्थी रस्त्यावर उतरले होते. निमित्त होते ‘नशामुक्त अमरावती अभियान’ अंतर्गत आयोजित करण्यात आलेल्या भव्य जनजागृती रॅलीचे. अमरावती शहर पोलीस आयुक्तालय आणि श्री हनुमान व्यायाम प्रसारक मंडळ (HVPM) यांच्या संयुक्त विद्यमाने या रॅलीचे आयोजन करण्यात आले होते. विशेष म्हणजे, या उपक्रमात सुमारे ८०० विद्यार्थी तसेच २०० पोलीस अधिकारी आणि अंमलदारांनी सहभाग नोंदविला. श्री हनुमान व्यायाम प्रसारक मंडळाच्या परिसरातून रॅलीला सुरुवात झाली. पद्मश्री प्रभाकरराव वैद्य आणि पोलीस आयुक्त राकेश ओला यांच्या हस्ते रॅलीला हिरवी झेंडी दाखविण्यात आली. रॅलीदरम्यान ‘नशामुक्त अमरावती’ आणि ‘व्यसनाला नकार, निरोगी जीवनाचा स्वीकार’ असे संदेश देण्यात आले. विशेषतः युवक आणि विद्यार्थ्यांनी अंमली पदार्थ व इतर व्यसनांपासून दूर राहावे, खेळ आणि सकारात्मक जीवनशैलीकडे वळावे, असा संदेश या उपक्रमातून देण्यात आला. आजच्या तरुण पिढीसमोर व्यसनांचे आव्हान मोठे होत असताना, केवळ कारवाई करून हा प्रश्न सुटणार नाही. त्यासाठी जनजागृती आणि युवकांचा सक्रिय सहभागही तितकाच महत्त्वाचा आहे. याच विचारातून राष्ट्रीय क्रीडा दिनाचे औचित्य साधत हा उपक्रम आयोजित करण्यात आला. रॅलीचा मार्ग HVPM परिसरातून राजकमल चौकापर्यंत होता. शहरातील प्रमुख मार्गावरून जात असताना विद्यार्थ्यांच्या घोषणांनी नागरिकांचे लक्ष वेधून घेतले.

राजकमल चौक येथे विद्यार्थ्यांनी आणि क्रीडापटूंनी विविध क्रीडा प्रात्यक्षिके सादर केली. या प्रात्यक्षिकांमधून केवळ खेळाचे प्रदर्शन झाले नाही, तर शारीरिक तंदुरुस्ती, शिस्त, आत्मविश्वास आणि क्रीडावृत्तीचे महत्त्वही अधोरेखित करण्यात आले. क्रीडा हा केवळ मनोरंजनाचा विषय नसून निरोगी आणि सकारात्मक जीवनशैलीचा महत्त्वाचा भाग आहे. त्यामुळे युवकांनी व्यसनांच्या आहारी न जाता खेळ, व्यायाम आणि विधायक उपक्रमांकडे वळावे, असा संदेश या कार्यक्रमातून देण्यात आला. अमरावती शहर नशामुक्त करण्यासाठी केवळ पोलीस किंवा एखादी संस्था पुरेशी नाही, तर समाजातील प्रत्येक घटकाचा सहभाग आवश्यक आहे, हा संदेशही या जनजागृती रॅलीतून देण्यात आला. कार्यक्रमास पद्मश्री प्रभाकरराव वैद्य, पोलीस आयुक्त राकेश ओला, पोलीस उपआयुक्त प्रांजली सोनवणे, डॉ. माधुरी चेंडके, प्राचार्य डॉ. श्रीनिवास देशपांडे, डॉ. संजय तिरथकर, अॅड. प्रशांत देशपांडे यांच्यासह पोलीस अधिकारी, कर्मचारी, HVPM चे पदाधिकारी, विद्यार्थी आणि युवक मोठ्या संख्येने उपस्थित होते. राजकमल चौकातील क्रीडा प्रात्यक्षिकांनंतर वंदे मातरम् आणि राष्ट्रगीताने कार्यक्रमाचा समारोप करण्यात आला.

राष्ट्रीय क्रीडा दिनाच्या निमित्ताने आयोजित करण्यात आलेल्या या उपक्रमाने अमरावतीकरांना एक स्पष्ट संदेश दिला—व्यसनाला नाही म्हणा आणि निरोगी, सक्षम व सकारात्मक जीवनाची निवड करा.