राजकोट – विजय हजारे ट्रॉफीत विदर्भचा धडाकेबाज फलंदाज ध्रुव शौरी सध्या अक्षरशः आग ओकतोय! हैदराबादविरुद्धच्या मॅचमध्ये त्याने फक्त 77 चेंडूत नाबाद 109 रन्सची विजयी खेळी खेळत क्रिकेटच्या इतिहासात आपलं नाव सुवर्णाक्षरात कोरलंय.
पण खरं तर या शतकाची खासियत काय आहे माहितीये? हे शौरीचं सलग पाचवं शतक आहे! हो, तुम्ही बरोबर वाचलंय – सलग पाचवं! या कामगिरीसोबत त्याने तामिळनाडूच्या दिग्गज एन. जगदीशनच्या लिस्ट ए क्रिकेटमधील महारेकॉर्डची बरोबरी केली आहे.
गेल्या वर्षीच्या नॉकआउटपासून सुरू झालेला विक्रमी प्रवास
शौरीचा हा शतकांचा धुमाकूळ गेल्या वर्षीच्या विजय हजारे ट्रॉफीच्या नॉकआउट टप्प्यापासून सुरू झाला. क्वार्टर फायनल, सेमीफायनल आणि फायनल – अशा तीन महत्त्वाच्या मॅचमध्ये त्याने बॅक टू बॅक शतके ठोकली. फायनलमध्ये जरी विदर्भला कर्नाटककडून पराभव पत्करावा लागला, पण शौरीची बॅट मात्र तडतडतच राहिली. या सीझनच्या पहिल्या मॅचमध्ये बंगालविरुद्ध त्याने 136 रन्सची खेळी साकारली आणि आता हैदराबादविरुद्ध पाचवं शतक पूर्ण केलंय. गेल्या सीझनमध्ये त्याने 8 इनिंग्समध्ये 494 रन्स केल्या आणि आता तो त्याच फॉर्ममध्ये सुरुवात करताना दिसतोय.
89 रन्सनं दणदणीत विजय
राजकोटच्या सनोसारा क्रिकेट ग्राऊंडवर झालेल्या या थरारक मॅचमध्ये शौरीच्या आक्रमक फलंदाजीमुळे विदर्भने हैदराबादवर 89 रन्सनं जोरदार विजय मिळवला. त्याच्या या विक्रमी कामगिरीमुळे आता भारतीय संघाचा वनडे कॅप्टन शुभमन गिल आणि इतर मोठ्या खेळाडूंचं लक्ष त्याच्याकडे वेधलं जाणार हे निश्चित!ज्या फॉर्ममध्ये शौरी सध्या खेळतोय, तो पाहता टीम इंडियामध्ये त्याला संधी मिळणं फार दूर नाही असं म्हणायला हरकत नाही. विदर्भसाठी तो सध्या खरा गेम चेंजर ठरतोय!