वाशीम – कल्पना करा, दररोज ४२ किलोमीटर धावणं… ते पण सलग ६० दिवस! आणि हे सगळं फक्त स्वतःसाठी नाही, तर भारतातील गरीब, अनाथ आणि वृद्धांसाठी. हीच आहे इंग्लंडच्या हना लोक्स ची खरी कहाणी, जी या क्षणी संपूर्ण देशात प्रेरणेची लहर निर्माण करत आहे.
एक स्त्री, एक स्वप्न, ४०३० किलोमीटरचा संकल्प
४१ वर्षीय हना लोक्स यांनी “प्रोजेक्ट सॉल्ट रन” अंतर्गत जो प्रवास सुरू केला आहे, तो अक्षरशः अविश्वसनीय आहे. २४ ऑक्टोबरला पंजाबमधील फिरोजपूर (भारत-पाकिस्तान सीमा) येथून सुरू झालेला हा प्रवास कोलकत्याजवळील भारत-बांगलादेश सीमेपर्यंत संपणार आहे. शुक्रवारी हना वाशीम जिल्ह्यातील रिसोड तालुक्यातील वाकद गावात पोहोचल्या आणि त्यांनी २४०० किलोमीटरचा महत्त्वाचा टप्पा यशस्वीरित्या पार केला. दररोज सरासरी ४२ किलोमीटर धावणं… हे ऐकायला सोपं वाटतं, पण करायला किती अवघड असेल याची कल्पना करा!
एकटी नाही, पण संकल्पाने एकच
या संपूर्ण प्रवासात हनासोबत आलेक्स जोयल आणि नारली हे सहकारी आहेत. मध्यप्रदेश नोंदणीचं एक चार चाकी वाहन त्यांच्यासोबत आहे, ज्यात राहणे, खाणे, पिणे आणि आवश्यक साहित्याची व्यवस्था केलेली आहे. पण रस्ता मात्र हना एकट्यानेच चालतेय – पाऊल टाकत, स्वप्न जगवत, आशा पसरवत.
आणखी ३८ दिवस, आणखी १६०० किलोमीटर
उर्वरित सुमारे ३८ दिवसात ही मानवतेची धाव कोलकत्याजवळील बांगलादेश सीमेपर्यंत पोहोचणार आहे. हा प्रवास केवळ अंतर पार करण्याचा नाही, तर मानुसकी जपण्याचा आहे. गरीब आणि अनाथांसाठी आशेचा संदेश देणारी ही यात्रा अनेकांसाठी खरोखरच प्रेरणादायी ठरत आहे. आज जेव्हा आपण आपल्या छोट्याश्या समस्यांसाठी हार मानतो, तेव्हा हना लोक्स सारख्या व्यक्ती आपल्याला आठवण करून देतात की – संकल्प असेल तर पायांखालचा रस्ता आणि डोक्यावरचं आकाश, दोन्ही साथ देतात.
हना लोक्स ची ही धाव केवळ एक उपक्रम नाही… ही एक संदेश आहे – माणुसकीचा, सेवेचा, आणि अमर्याद इच्छाशक्तीचा!